Estáu d'esceición
Dientro de la mala calidá democrática del estáu español, onde nun se respeten nin la separación de poderes nin el principiu representativu, rescampla que, ensin que casi naide gorgute, s'aplique un auténticu estáu d'esceición n'Euskadi. La xente nin se pue manifestar llibremente, nin pue votar lo que quier. Esta vuelta la Ertzaintza sostituye a los grises, pero lo qu'asocede ye franquismu puru, sin más
Diráseme que son violentos, el brazu políticu de ETA y ye verdá, pero güei declaramos ilegales a estos por esto, y, quiciabes mañana a otros por otra cosa. ¿Cuálu va ser el criteriu? ¿Quién lo va decidir? ¿Los dos partíos españoles mayoritarios interesaos n'eliminar competidores ellectorales? Si xugamos a la democracia, xuégase con toles consecuencies, seique los resultaos seyan odiosos, incluso anque se llegue a la propia lliquidación de la democracia por vies democrátiques. Na dómina que taba na facultá de Derechu, ficiéronme estudiar un llibru de derechu constitucional (1º cursu) que ñegaba esta última posibilidá. Nunca tuvi d'alcuerdu. Claru qu'esi mesmu llibru aprebaba la espropiación de Rumasa per decretu-llei
txeba5 @ 16:03
Esbilla
del.icio.us